Imithetho Yomgwaqo

Amafulegi Esixwayiso Nokushayela Emigwaqweni Ehlukanisiwe

Amafulegi esixwayiso / izikhanyisi

Lapho noma yimuphi umthwalo uphuma ngaphezu kwama-150 amamilimitha eceleni, noma ngaphezu kwama-300 amamilimitha ngemuva, kumele umakwe ngalokhu:

  • ifulegi noma amafulegi abomvu (300 mm x 300 mm) emini, futhi
  • izikhanyisi ebusuku, noma
  • nganoma yisiphi esinye isikhathi lapho abantu nezimoto kungabonakali kahle ngenxa yezimo ezingezinhle. Izikhanyisi ezimhlophe ngaphambili nezikhanyisi ezibomvu ngemuva.

Ukushayela emgwaqweni womphakathi ohlukanisiwe

Noma nini lapho umgwaqo womphakathi uhlukaniswe waba yizindlela ezimbili noma ngaphezulu, akekho umuntu okumele ashayele imoto kulowo mgwaqo womphakathi ngaphandle kwasendleleni yesokunxele, ngaphandle uma eyalwa noma evunyelwe uphawu lomgwaqo olufanele noma isikhulu sezomgwaqo ukuthi asebenzise enye indlela.

Ukushayela ngakwesokunxele sendlela

Noma yimuphi umuntu oshayela imoto emgwaqweni womphakathi kumele ashayele ngakwesokunxele sendlela, futhi lapho indlela ibanzi ngokwanele, ngendlela engeke ingene kuleyo ngxenye yendlela esesandleni sakhe sokudla.

Kodwa ukungena okunjalo kuyavunyelwa —

  • lapho kungenziwa ngaphandle kokuvimba noma ukubeka engozini enye ithrafikhi, noma
  • ngokulandela isiqondiso sesikhulu sezomgwaqo noma sophawu lomgwaqo.

Lapho uqaphela enye ithrafikhi ehamba ngendlela efanayo efuna ukudlula imoto yakho —

  • shayela useduze ngangokunokwenzeka nomphetho wesokunxele wendlela, ngaphandle kokuzibeka engozini wena, enye ithrafikhi noma impahla, futhi
  • ungasheshisi isivinini semoto yakho kuze kube enye imoto isidlulile.